აირჩიეთ ქალაქი აირჩიეთ ქალაქი

ბიგეტრიკი — პრეპარატი ღებინებისა და გაზების დაგროვების წინააღმდეგ

უკან

ბიგეტრიკი — პრეპარატი ღებინებისა და გაზების დაგროვების წინააღმდეგ

5 აგვ 2025

ბიგეტრიკი ტაბლეტი

 

ბიგეტრიკი არგენტინაში წარმოებული პრეპარატია, რომელიც ტაბლეტების ფორმით არის წარმოდგენილი. მისი აქტიური ნივთიერებებია დომპერიდონი და სიმეთიკონი.

ბიგეტრიკის თითოეული ტაბლეტი შეიცავს: 10.000 მგ დომპერიდონს და 200.000 მგ სიმეთიკონს. დამხმარე ნივთიერებების სახით მასში ასევე შედის ხორბლის სახამებელი (12.059 მგ), კალციუმის კარბონატი (194.100 მგ), მსუბუქი მაგნიუმის კარბონატი (208.200 მგ), მიკროკრისტალური ცელულოზა (62.300 მგ), პოვიდონი K-30 (83.800 მგ), ნატრიუმის საქარინი (0.600 მგ), ნატრიუმის კროსკარმელოზა (22.900 მგ) და მაგნიუმის სტეარატი (5.880 მგ).

ბიგეტრიკის ერთ შეფუთვაში 20 ტაბლეტია. PSP-ს აფთიაქებში პრეპარატი ექიმის რეცეპტის საფუძველზე გაიცემა.

რა არის და რისთვის იყენებენ ბიგეტრიკს?  

წამალი ბიგეტრიკი არის გასტროკინეზური მოქმედების სამკურნალო საშუალება, რომელიც ღებინებისა და ნაწლავებში გაზების დაგროვების წინააღმდეგ ეფექტიანობით ხასიათდება.

მისი გამოყენება არ არის რეკომენდებული პაციენტებისთვის, რომლებსაც დომპერიდონის მიმართ ჰიპერმგრძნობელობა აღენიშნებათ. მიუხედავად იმისა, რომ დომპერიდონზე ჩატარებულ კვლევებში ტერატოგენული ეფექტები არ გამოვლენილა, ორსულობის პერიოდში პრეპარატის დანიშვნა რეკომენდებულია მხოლოდ სარგებლისა და პოტენციური რისკების შეფასების შემდეგ.

გარდა ამისა, გაითვალისწინეთ, განსაკუთრებული ყურადღებაა საჭირო იმ შემთხვევაში, თუ პაციენტი იღებს ანტიქოლინერგულ პრეპარატებს, ვინაიდან ისინი ბიგეტრიკის თერაპიულ ეფექტს ამცირებს.

 

 ბიგეტრიკი შებერილობა

როგორია ბიგეტრიკის მიღების წესი და დოზირება 

ვიდრე მედიკამენტით მკურნალობას დაიწყებთ, ბიგეტრიკის ინსტრუქციას კარგად უნდა გაეცნოთ. დამატებით, თუ რაიმე შეკითხვა გაგიჩნდებათ, მათზე კომპეტენტური პასუხების მისაღებად ექიმს მიმართეთ.

რაც შეეხება ბიგეტრიკის გამოყენების წესსა და დოზირებას, პრეპარატის ტაბლეტები მიიღება პერორალურად, პირის ღრუს გავლით. ადვილად გადასაყლაპად შეგიძლიათ, წამალს მცირე რაოდენობის წყალი მიაყოლოთ. ბიგეტრიკის რეკომენდებული დოზა ერთ მიღებაზე 1-2 ტაბლეტს შეადგენს. მისი მიღება შეიძლება დღეში 3-4-ჯერ, რაც სიმპტომების ინტენსივობასა და ექიმის რეკომენდაციაზეა დამოკიდებული.

საუკეთესო თერაპიული ეფექტისთვის წამლის დალევა რეკომენდებულია საკვების მიღებამდე მცირე ხნით ადრე. ეს მის უკეთ შეთვისებას უზრუნველყოფს და ეფექტიანად შეამცირებს როგორც მუცლის შებერილობას, ისე ღებინების ან გულისრევის ნიშნებს.

რეკომენდებულ დოზას თვითნებურად არ უნდა გადააჭარბოთ. მკურნალობის ხანგრძლივობა და სიხშირე ინდივიდუალურად განისაზღვრება მკურნალი ექიმის მიერ, პაციენტის მდგომარეობისა და კლინიკური სურათის გათვალისწინებით.

პრეპარატის მოსალოდნელი გვერდითი მოვლენები 

ბიგეტრიკის მიღებისას, ისევე როგორც მედიკამენტების დიდი ნაწილის შემთხვევაში, შესაძლოა რიგი არასასურველი ეფექტები გამოვლინდეს. თუმცა ეს ეფექტები, როგორც წესი, მსუბუქი და დროებითია. მათ შორისაა პირის სიმშრალე, რომელიც საკვების მიღებისას ან საუბრის დროს ზოგჯერ დისკომფორტს იწვევს. ასევე შესაძლებელია განვითარდეს ნაწლავის სპაზმები.

იშვიათად აღინიშნება შაკიკი, რომელიც თავის ტკივილის სახით ვლინდება და შესაძლოა თან ახლდეს წნევის მცირე ცვლილებები. ზოგიერთ პაციენტში ფიქსირდება ძილიანობა, ნერვული აღგზნებადობა ან ნევროზული სიმპტომები.

კანის მხრივ შესაძლოა განვითარდეს ალერგიული რეაქციები, მათ შორის ქავილი, რაც ჰიპერმგრძნობელობის სავარაუდო გამოვლინებაზე მიუთითებს.

ამ დროისთვის ბიგეტრიკის მიმართ კონკრეტული ანტაგონისტები ან ანტიდოტები ცნობილი არ არის. პრეპარატის დოზის გადაჭარბების ან გვერდითი ეფექტების გამოვლენის შემთხვევაში საჭიროა სიმპტომური მკურნალობა. თუ რომელიმე გვერდითი მოვლენა მძიმე ფორმით გამოვლინდება ან უცნაურ რეაქციას შენიშნავთ, დაუყოვნებლივ მიმართეთ ექიმს.

5 აგვ 2025