აირჩიეთ ქალაქი აირჩიეთ ქალაქი

ნაპროფი – საყრდენ-მამოძრავებელი სისტემის ანთებით-დეგენერაციული დაავადებების სამკურნალოდ

უკან

ნაპროფი – საყრდენ-მამოძრავებელი სისტემის ანთებით-დეგენერაციული დაავადებების სამკურნალოდ

17 სექ 2025

 

საყრდენ-მამოძრავებელი სისტემის დაავადებები, სხვადასხვა სახის ანთებითი პროცესები და ტკივილის სინდრომი ხშირად ზღუდავს ყოველდღიურ აქტივობას. ამ პრობლემების მოსაგვარებლად კი თანამედროვე მედიცინა ანთების საწინააღმდეგო და ტკივილგამაყუჩებელ თერაპიებს გვთავაზობს. მსგავს არასტეროიდულ ანთების საწინააღმდეგო საშუალებებს შორის არის ნაპროფი – ნატრიუმის ნაპროქსენზე დაფუძნებული პრეპარატი.

მედიკამენტი ორი დოზირებით არის წარმოდგენილი – ნაპროფი 275 მგ-იანი და ნაპროფი 550 მგ-იანი შემოგარსული ტაბლეტების სახით. ტაბლეტების გარდა, ასევე ხელმისაწვდომია ნაპროფის გელი, რომლის ერთ ტუბში 45 გრამი მალამოა. პსპ-ის აფთიაქებში ნაპროფის ტაბლეტები ექიმის რეცეპტის საფუძველზე გაიცემა, ნაპროფის მალამოს კი რეცეპტის გარეშე მიიღებთ.

რისთვის იყენებენ ნაპროფის ტაბლეტებსა და მალამოს? (H2) 

ნაპროფის ტაბლეტები გამოიყენება როგორც ტკივილგამაყუჩებელი, ანთების საწინააღმდეგო და სიცხის დამწევი საშუალება სხვადასხვა დაავადებებისა და მდგომარეობის დროს, მათ შორისაა:

  • საყრდენ-მამოძრავებელი აპარატის ანთებით-დეგენერაციული დაავადებები:
    რევმატოიდული და პოდაგრული ართრიტი, მაანკილოზებელი სპონდილოართრიტი (ბეხტერევის დაავადება), ოსტეოართროზი, რბილი ქსოვილების რევმატოიდული დაზიანება, პერიფერიული სახსრებისა და ხერხემლის ოსტეოართროზი (მათ შორის რადიკულური სინდრომით), ტენდოვაგინიტი, ბურსიტი.
  • ტკივილის სინდრომი:
    მიალგია, ოსალგია, ნევრალგია, ართრალგია, რადიკულიტი, პოდაგრა, თავისა და კბილის ტკივილი, ტენდინიტი, ონკოლოგიური დაავადებებით გამოწვეული ტკივილი, ანთებით მიმდინარე პოსტტრავმული და ოპერაციის შემდგომი ტკივილი (ტრავმატოლოგია, ორთოპედია, გინეკოლოგია, ყბა-სახის ქირურგია), ალგოდისმენორეა, ადნექსიტი.
  • ინფექციურ-ანთებითი დაავადებები:
    როგორც დამხმარე საშუალება – ზედა სასუნთქი გზების ინფექციების დროს (ფარინგიტი, ტონზილიტი, ოტიტი) გამოხატული ტკივილის შესამსუბუქებლად.
  • ცხელების სინდრომი:
    გაციებისა და სხვადასხვა ინფექციური დაავადებებისას – სიმპტომური თერაპიისთვის (ტკივილის, ანთების და სხეულის მომატებული ტემპერატურის შესამცირებლად) და უშუალო გავლენას არ ახდენს დაავადების პროგრესირებაზე.
  • შაკიკის შეტევები და პროფილაქტიკა.

რაც შეეხება ნაპროფის გელს, იგი გამოიყენება ადგილობრივად ტკივილგამაყუჩებელი და ანთების საწინააღმდეგო საშუალების სახით, განსაკუთრებით საყრდენ-მამოძრავებელი აპარატის დაავადებებისა და ოსტეოართრიტის დროს.

 

 

როგორ და რა დოზებით გამოვიყენოთ პრეპარატი? 

ნაპროფის ტაბლეტები მიიღება პერორალურად, დაღეჭვის გარეშე, გადასაყლაპად საკმარისი რაოდენობის წყალთან ერთად. დაიმახსოვრეთ, დოზირების რეჟიმის შეცვლა ან მკურნალობის შეწყვეტა მხოლოდ ექიმთან კონსულტაციის შემდეგ უნდა მოხდეს.

  • საყრდენ-მამოძრავებელი აპარატის ანთებით-დეგენერაციული დაავადებები:
    550-1100 მგ დღეში ორჯერ, 12-საათიანი ინტერვალით. შენარჩუნებითი თერაპიისთვის – 550 მგ დღეში ერთხელ.
  •  ტკივილის სინდრომი:
    საწყის ეტაპზე 550 მგ, შემდეგ 275 მგ ყოველ 6-8 საათში. მაქსიმალური დღიური დოზა – 1375 მგ. აუცილებლობის შემთხვევაში, პაციენტებში, რომელთაც კუჭ-ნაწლავის დაავადებები არ აღენიშნებათ, შეიძლება დოზა დროებით გაიზარდოს 1650 მგ-მდე.
  • პოდაგრის შეტევა:
    საწყისი დოზა – 825 მგ, შემდეგ 275 მგ ყოველ 8 საათში, შეტევის დასრულებამდე.
  • შაკიკი:
    პროფილაქტიკისთვის – 550 მგ დღეში ორჯერ. თერაპია უნდა შეწყდეს, თუ 4-6 კვირის განმავლობაში შეტევების სიხშირე, ინტენსივობა ან ხანგრძლივობა არ მცირდება. პირველი ნიშნების დროს – 825 მგ, საჭიროების შემთხვევაში დამატებით 275-550 მგ 30 წუთის შემდეგ.
  • მენსტრუალური და გინეკოლოგიური ტკივილი:
    საწყისი დოზა – 550 მგ, შემდგომ 275 მგ ყოველ 6-8 საათში. ასევე გამოიყენება საშვილოსნოსშიდა სპირალის შეყვანისას და მშობიარობისას როგორც ტკივილგამაყუჩებელი და ტოკოლიზური საშუალება.
  • ცხელება:
    საწყისი დოზა – 550 მგ, შემდეგ 275 მგ ყოველ 6-8 საათში, საჭიროებისამებრ.

ნაპროფის გელი კანის დაზიანებულ უბანზე, მისი ზომის შესაბამისად (საშუალოდ დაახლოებით 4 სმ) უნდა წაისვათ. პრეპარატი ფრთხილად შეიზილეთ, სანამ სრულად არ შეიწოვება. მისი გამოყენება დღეში 4-5-ჯერ, რამდენიმე საათიანი ინტერვალით არის რეკომენდებული. გამოყენების შემდეგ კი აუცილებელია ხელების დაბანა.

გაითვალისწინეთ, პრეპარატის 4 კვირაზე მეტხანს გამოყენება მიზანშეწონილი არ არის. იმ შემთხვევაში, თუ ტკივილი ან შეშუპება ერთ კვირაში არ მცირდება ან მდგომარეობა უარესდება, საჭიროა ექიმთან კონსულტაცია.

ამასთან, მალამოს გამოყენებისას კანის სიწითლის და გაღიზიანების აღმოჩენის შემთხვევაში მკურნალობა დაუყოვნებლივ უნდა შეწყდეს. თუ სიმპტომები კვლავ შენარჩუნდება, აუცილებელია სასწრაფო სამედიცინო დახმარებისთვის მიმართვა.

 

ნაპროფის მოსალოდნელი გვერდითი მოვლენები 

ნაპროფის ტაბლეტები და გელი, ზოგადად, კარგად აიტანება, თუმცა ზოგიერთ შემთხვევაში შესაძლოა, არასასურველი რეაქციები გამოვლინდეს:

  • კუჭ-ნაწლავის მხრივ: გულისრევა, ღებინება, გულძმარვა, ყაბზობა, დიარეა, ეროზიულ-წყლულოვანი დაზიანებები, კუჭ-ნაწლავის ტრაქტიდან სისხლდენა.
  • ნერვული სისტემა: თავის ტკივილი, ძილიანობა, ყურებში ხმაური, თავბრუსხვევა, სისუსტე, რეაქციის შენელება.
  • გულ-სისხლძარღვთა და სისხლმბადი სისტემა: გულისცემის აჩქარება, ლეიკოპენია, თრომბოციტოპენია, ანემია, გრანულოციტოპენია.
  • ალერგიული რეაქციები: კანზე გამონაყარი, ჭინჭრის ციება, მომატებული მგრძნობელობა.
  • კანისა და კანქვეშა ქსოვილების მხრივ (გელის გამოყენებისას): იშვიათად – ადგილობრივი გაღიზიანება (ერითემა, წვა, ქავილი), რომელიც, როგორც წესი, მკურნალობის შეწყვეტის შემდეგ ქრება.

გელის ხანგრძლივი გამოყენებისას, განსაკუთრებით დაზიანებული კანის დიდ ზედაპირზე, შესაძლოა განვითარდეს სისტემური არასასურველი ეფექტები, რომლებიც ტაბლეტებისთვისაც არის დამახასიათებელი (გულისრევა, დიარეა, ძილიანობა, თავის ტკივილი, ალერგიული რეაქციები).

ქოშინის, დერმატიტის ან სხვა მძიმე რეაქციის გამოვლენის შემთხვევაში პრეპარატის გამოყენება დაუყოვნებლივ უნდა შეწყდეს და საჭიროა ექიმთან კონსულტაცია.

17 სექ 2025