აირჩიეთ ქალაქი აირჩიეთ ქალაქი

რისთვის გამოიყენება ლევოფლოქსაცინი – ყველაფერი მედიკამენტის შესახებ

უკან

რისთვის გამოიყენება ლევოფლოქსაცინი – ყველაფერი მედიკამენტის შესახებ

6 ივლ 2025

 პრეპარატი ლევოფლოქსაცინი

ბაქტერიული ინფექციების მკურნალობისას განსაკუთრებით მნიშვნელოვანია მედიკამენტების სწორად შერჩევა, რისთვისაც აუცილებელია არა მხოლოდ პაციენტის მდგომარეობის სიმწვავის გათვალისწინება, არამედ არჩევანის თანამედროვე და ეფექტიან პრეპარატებზე გაკეთება. ექიმის ამოსავალი არა მხოლოდ პაციენტის სწრაფი გამოჯანმრთელება, არამედ გვერდითი მოვლენების მინიმუმამდე დაყვანა და ანტიბიოტიკების მიმართ ბაქტერიების რეზისტენტობის პრევენცია უნდა იყოს. 

ერთ-ერთი მედიკამენტი, რომელიც განსაკუთრებით ეფექტიანია ბაქტერიებით გამოწვეულ ინფექციურ დაავადებებთან ბრძოლაში, ლევოფლოქსაცინია. ის წარმოადგენს ახალი თაობის ანტიბიოტიკს, რომელსაც ფართო სპექტრის ანტიმიკრობული მოქმედება ახასიათებს.

რა არის ლევოფლოქსაცინი? 

ლევოფლოქსაცინი ფტორქინოლონების ჯგუფის პრეპარატია. ის წარმოდგენილია როგორც ტაბლეტების, ისე ხსნარის სახით ინტრავენური ინიექციისთვის. მედიკამენტი ხშირად გამოიყენება ისეთი ინფექციების სამკურნალოდ, რომლებიც გამოწვეულია ლევოფლოქსაცინზე მგრძნობიარე მიკროორგანიზმებით. 

ლევოფლოქსაცინის ერთ-ერთი მთავარი უპირატესობაა ის, რომ მას გააჩნია უფრო ძლიერი ბაქტერიოციდული მოქმედება ნაკლები დოზითაც კი. ის უზრუნველყოფს ბაქტერიული ტიპი II ტოპოიზომერაზას, ტოპოიზომერაზა IV-სა და დნმ-ჰირაზას ინჰიბირებას. ამ გზით იზღუდება ბაქტერიების გამრავლება, რაც საბოლოოდ მათი სრული განადგურებით სრულდება.

ლევოფლოქსაცინის გამოყენების სპექტრი საკმაოდ ფართოა. ის ინიშნება როგორც მსუბუქი, ისე გართულებული ინფექციების სამკურნალოდ, მათ შორისაა:

ლევოფლოქსაცინი სწრაფად აღწევს სინუსების ლორწოვან გარსში, ბრონქებსა თუ ფილტვებში, რაც მედიკამენტის აქტიურ ნივთიერებებს სწრაფად მოქმედების საშუალებას აძლევს. შესაბამისად, ის მალევე აჩერებს ბაქტერიების გამრავლებისა და ინფექციის განვითარების პროცესს. მედიკამენტი ანადგურებს როგორც გრამდადებით, ისე გრამუარყოფით ბაქტერიებს, რომლებიც ხშირად იწვევენ სასუნთქი გზების ინფექციებს. ლევოფლოქსიცინის დახმარებით შესაძლებელია სერიოზული გართულებების პრევენციაც.

ლევოფლოქსაცინი მარტივად აღწევს საშარდე სისტემაში, პროსტატის ქსოვილებსა და თირკმელებში, რაც უზრუნველყოფს მედიკამენტის მოქმედებას ინფექციის კერაზე. ის სწრაფად აჩერებს ისეთ სიმპტომებს, როგორებიცაა ტკივილი, წვა შარდვის დროს, შარდვის ხშირი და ძლიერი მოთხოვნილება და სხვა. მედიკამენტი უზრუნველყოფს ქრონიკული პიელონეფრიტის ან პროსტატიტის გადიდების პრევენციას. 

  • კანისა და რბილი ქსოვილების ინფექციები, როგორიცაა, მაგალითად, ფურუნკულოზი. ასევე, გამოიყენება ინფიცირებული ჭრილობების, კანის რბილი ქსოვილების მწვავე ანთებითი პროცესების, ჩირქოვანი წარმონაქმნების დროს. 

ლევოფლოქსაცინი სწრაფად აჩერებს ინფექციას, ხსნის ტკივილს და ამცირებს ანთებით პროცესს. მედიკამენტი ეფექტიანია გართულებული შემთხვევების, ინფექციის ღრმა ქსოვილებში გავრცელების დროსაც.  

  • ინჰალაციური ანთრაქსი (პროფილაქტიკა და მკურნალობა) – ის იშვიათი, მაგრამ მძიმედ მიმდინარე და სახიფათო ბაქტერიული ინფექციაა, რომელიც ბაქტერია Bacillus anthracis-ითაა გამოწვეული. 

ლევოფლოქსაცინი გამოიყენება საპროფილაქტიკოდ იმ ადამიანებში, რომლებსაც შესაძლოა შეხება ჰქონოდათ ბაქტერიასთან. ასევე, ის ინიშნება უკვე ინფიცირებულ პაციენტებში მკურნალობის მიზნით. ანთრაქსის პროფილაქტიკური კურსი ჩვეულებრივ რამდენიმე კვირის განმავლობაში გრძელდება. მკურნალობის შემთხვევაში, მისი დოზა და თერაპიის ხანგრძლივობა დამოკიდებულია დაავადების სიმძიმეზე და პაციენტის ზოგად მდგომარეობაზე. 

როგორ მიიღება ეს მედიკამენტი სხვადასხვა ტიპის ინფექციისას?

დოზა და მკურნალობის ხანგრძლივობა დამოკიდებულია ინფექციის ტიპზე, სიმძიმეზე და პაციენტის ზოგად ჯანმრთელობაზე. ტაბლეტები, ჩვეულებრივ, მიიღება დღეში 1-2-ჯერ, საკვებთან ან საკვების გარეშე. პრეპარატის მიღება სასურველია მოხდეს ერთსა და იმავე დროს, დიდი რაოდენობის წყლის დაყოლებით. 

ლევოფლოქსაცინის რეკომენდებული დოზები ინფექციების მიხედვით:

სასუნთქი გზების ინფექციები

  • მწვავე სინუსიტი – დოზა: 500 მგ 1-ჯერ დღეში; ხანგრძლივობა: 10-14 დღე
    გამწვავებული ქრონიკული ბრონქიტი – დოზა: 500 მგ 1-ჯერ დღეში; ხანგრძლივობა: 7-14 დღე
  • პნევმონია – დოზა: 500 მგ დღეში 1-2-ჯერ; ხანგრძლივობა: 7-14 დღე

შარდსასქესო სისტემის ინფექციები

  • მწვავე პიელონეფრიტი – დოზა: 500 მგ 1-2-ჯერ დღეში; ხანგრძლივობა: 7-10 დღე;
  • ბაქტერიული პროსტატიტი – დოზა: 500 მგ 1-ჯერ დღეში; ხანგრძლივობა: 28 დღე (შესაძლოა საჭირო გახდეს მკურნალობის გახანგრძლივება)
    ცისტიტი – დოზა: 250 მგ 1-ჯერ დღეში; ხანგრძლივობა: 3 დღე

კანისა და რბილი ქსოვილების ინფექციები – დოზა: 500 მგ 1-2-ჯერ დღეში; ხანგრძლივობა: 7-14 დღე

ინჰალაციური ანთრაქსი – დოზა: 500 მგ დღეში 2-ჯერ; ხანგრძლივობა: პროფილაქტიკა – 60 დღე; მკურნალობა – დამოკიდებულია სიმძიმეზე, 60 დღე ან მეტი

გაითვალისწინეთ, ეს მხოლოდ ზოგადი რეკომენდაციებია, დოზებისა და მკურნალობის ხანგრძლივობის განსაზღვრა უნდა მოხდეს სპეციალისტის მიერ. გარდა ამისა, ძალიან მნიშვნელოვანია, რომ პაციენტმა არ შეწყვიტოს მკურნალობა თვითნებბურად, სიმპტომების გაქრობისთანავე. მკურნალობის კურსის შეწყვეტამ შეიძლება გამოიწვიოს რეციდივი ან ბაქტერიის რეზისტენტობა ანტიბიოტიკის მიმართ. 

 

მედიკამენტი ლევოფლოქსაცინი

ვისთვის არ არის რეკომენდებული ლევოფლოქსაცინის მიღება — უკუჩვენებები 

ლევოფლოქსაცინი გარკვეულ შემთხვევებში შეიძლება არა მხოლოდ არაეფექტიანი, არამედ საშიშიც კი იყოს ჯანმრთელობისთვის.

ლევოფლოქსაცინი არ უნდა მიიღოს პაციენტმა, თუ მას აქვს:

  • ალერგია ლევოფლოქსაცინის ან ფტორქინოლონების ჯგუფის სხვა პრეპარატების მიმართ (მაგალითად, ციპროფლოქსაცინი, მოქსიფლოქსაცინი და სხვა);
  • ეპილეფსია ან კრუნჩხვებისადმი მიდრეკილება – ფტორქინოლონებს შეუძლიათ ცენტრალურ ნერვულ სისტემაზე ზემოქმედება და კრუნჩხვების პროვოცირება;
  • ძვლების ზრდის პროცესის დარღვევები – განსაკუთრებით ბავშვებსა და მოზარდებში, რომლებსაც ჯერ კიდევ არ დაუსრულებიათ ძვლის სისტემის ფორმირება;
  • ორსულობა და ლაქტაცია – ლევოფლოქსაცინმა შეიძლება გავლენა მოახდინოს ნაყოფის ან ჩვილის განვითარებაზე, ამიტომ ორსულებსა და მეძუძურ დედებში ის, როგორც წესი, არ ინიშნება;
  • 18 წლამდე ასაკი – ძვალსახსროვანი სისტემის განვითარების რისკების გამო.

სიფრთხილე მართებთ:

  • ხანდაზმულებს, განსაკუთრებით მათ, ვისაც თირკმლის ფუნქციის დაქვეითება აქვთ. თირკმელების დაზიანების დროს პრეპარატის გამოდევნა ნელდება, რაც ზრდის ტოქსიკურობის რისკს;
  • გულის რითმის დარღვევების მქონე პაციენტებს – რადგან ლევოფლოქსაცინმა შეიძლება კიდევ უფრო გაზარდოს არითმიის განვითარების რისკი;
  • მათ, ვინც იღებენ სხვა მედიკამენტებს – განსაკუთრებით ისეთ პრეპრატებს, რომლებიც ზემოქმედებენ გულზე, ნერვულ სისტემაზე ან თირკმელებზე. ლევოფლოქსაცინის მათთან ერთად მიღებამ შეიძლება გამოიწვიოს უარყოფითი ურთიერთქმედება ან გვერდითი მოვლენების გამძაფრება. 

როგორია პრეპარატის გვერდითი მოვლენები

ლევოფლოქსაცინის მიღებისას შესაძლოა გამოვლინდეს სხვადასხვა სახის გვერდითი ეფექტი. ხშირად ეს სიმპტომები მსუბუქი და დროებითია, თუმცა ზოგჯერ, სიმწვავის გამო, საჭიროა მედიკამენტის შეწყვეტა. 

ყველაზე გავრცელებული გვერდითი მოვლენებია:

  • გულისრევა და ზოგჯერ ღებინება;
  • დიარეა ან კუჭ-ნაწლავის სხვა მსუბუქი დარღვევები;
  • თავბრუსხვევა, დაღლილობა;
  • უძილობა ან ძილის რეჟიმის ცვლილება;
  • მგრძნობელობა მზის მიმართ (ფოტოტოქსიკურობა) – ეს ნიშნავს, რომ პრეპარატის მიღებისას მზის სხივების ზემოქმედებამ შეიძლება გამოიწვიოს კანის დამწვრობა ან გამონაყარი;
  • კუნთების ან სახსრების ტკივილი.

იშვიათად ასევე შეიძლება გამოვლინდეს:

  • ნევროლოგიური სიმპტომები, როგორებიცაა შიშის ან პანიკის შეგრძნება, დაძაბულობა, დაბნეულობა;
  • ჰალუცინაციები ან აგრესიული ქცევა;
  • მძიმე ალერგიული რეაქციები – გამონაყარი კანზე, ქავილი, სახის ან ენის შეშუპება, სუნთქვის გაძნელება (ამ შემთხვევაში საჭიროა სასწრაფო დახმარება).

როგორ ურთიერთქმედებს ლევოფლოქსაცინი სხვა პრეპარატებთან

ფტორქინოლონების ჯგუფის ანტიბიოტიკებს, როგორიცაა ლევოფლოქსაცინი, შესაძლოა ჰქონდეს მნიშვნელოვანი ფარმაკოკინეტიკური და ფარმაკოდინამიკური ურთიერთქმედება, რაც გავლენას ახდენს როგორც თავად ლევოფლოქსაცინის, ისე სხვა პრეპარატების მოქმედებაზე, ეფექტიანობასა და უსაფრთხოებაზე. ამიტომ ლევოფლოქსაცინის მიღებამდე აუცილებელია პაციენტმა აცნობოს ექიმს ყველა იმ მედიკამენტის შესახებ, რომელსაც იგი იღებს, მათ შორის ვიტამინების, მინერალებისა და მცენარეული პრეპარატების ჩათვლით.

თუ ქვემოთ ჩამოთვლილ მედიკამენტთა ჯუგფებიდან რომელიმეს იღებთ, მაშინ ლევოფლოქსაცინის მოხმარებისას მეტი სიფრთხილე და ექიმის რეკომენდაციების გათვალისწინება გმართებთ. ესენია:

  • რკინისა და მაგნიუმის შემცველი პრეპარატები, ანტაციდები, კალციუმის დანამატები და სუკრალფატი – ეს მედიკამენტები აფერხებს ლევოფლოქსაცინის შეწოვას კუჭ-ნაწლავის ტრაქტიდან და ამცირებს ბიოშეღწევადობას. ამიტომ ლევოფლოქსაცინი უნდა დალიოთ მათი მიღებიდან 2 საათით ადრე ან 2 საათის შემდეგ.
  • ვარფარინი და სხვა ანტიკოაგულანტები – ლევოფლოქსაცინმა შეიძლება გააძლიეროს ანტიკოაგულანტური ეფექტი, რაც ზრდის სისხლდენის რისკს. ზოგჯერ აღინიშნება სისხლის შედედების მაჩვენებლის (INR) მატება. ამ კომბინაციისას საჭიროა სისხლის შედედების მონიტორინგი. ექიმმა შესაძლოა შეცვალოს დოზა ან გაახშიროს ლაბორატორიული კვლევები.
  • ინსულინი და პერორალური ჰიპოგლიკემიური საშუალებები – ლევოფლოქსაცინი ზოგჯერ იწვევს ჰიპოგლიკემიას ან ჰიპერგლიკემიას, განსაკუთრებით დიაბეტის მქონე პაციენტებში, რაც მოითხოვს სისხლში გლუკოზის მკაცრ კონტროლს. 
  • ნეიროლეპტიკები და თეოფილინი – ორივე პრეპარატს აქვს კრუნჩხვების პროვოცირების პოტენციალი. ლევოფლოქსაცინთან კომბინაციამ კი შეიძლება კრუნჩხვების ან ნეიროტოქსიურობის რისკი კიდევ უფრო გაზარდოს. ამიტომ ამ შემთხვევაშიც აუცილებელია დოზების სწორად შერჩევა და ექიმის მეთვალყურეობა. 
  • არასტეროიდული ანთების საწინააღმდეგო პრეპარატები – ლევოფქლოქსაცინის მათთან კომბინაციამ შეიძლება გამოიწვიოს ცენტრალური ნერვული სისტემის გაღიზიანება და კრუნჩხვების განვითარების რისკი.

პრაქტიკული რჩევები პაციენტებისთვის

პირველ რიგში, აუცილებელია მკაცრად დაიცვათ დოზირება. თუ ერთი დოზის მიღება დაგავიწყდათ, არ მიიღოთ ორმაგი დოზა კომპენსაციისთვის, რადგან ამან შესაძლოა გაზარდოს გვერდითი მოვლენების გამოვლენის რისკი. 

არ მიიღოთ ალკოჰოლი მკურნალობის პერიოდში. ალკოჰოლი აძლიერებს პრეპარატის გვერდით მოვლენებს, განსაკუთრებით აპროვოცირებს ნევროლოგიურ სიმპტომებს, როგორებიცაა თავბრუსხვევა, დაბნეულობა და შფოთვა.

ლევოფლოქსაცინით მკურნალობისას, სასურველია, მოერიდოთ მზეზე დიდხანს ყოფნას. გარდა ამისა, გამოიყენეთ მზისგან დამცავი კრემი და ატარეთ დახურული ტანსაცმელი. 

დაბოლოს, ნებისმიერი გვერდითი მოვლენის გამოვლენის შემთხვევაში მიმართეთ ექიმს, დაიცავით სიფრთხილის ზომები და გაუფრთხილდით ჯანმრთელობას. 

6 ივლ 2025