აირჩიეთ ქალაქი აირჩიეთ ქალაქი

ნოზეილინი — თვალისა და ცხვირის წვეთები ალერგიასთან საბრძოლველად

უკან

ნოზეილინი — თვალისა და ცხვირის წვეთები ალერგიასთან საბრძოლველად

6 აგვ 2025

ნოზეილინი ფასი

 

ნოზეილინის წვეთები კომბინირებულ მოქმედების პრეპარატია, რომელიც განკუთვნილია როგორც თვალის ალერგიული დაავადებების, ისე ცხვირის ლორწოვანი გარსის ანთებითი და ალერგიული მდგომარეობების სამკურნალოდ. პრეპარატი წარმატებით გამოიყენება ისეთ მდგომარეობებში, როგორიცაა ალერგიული რინიტი, სურდო, სინუსიტი და სხვა.

მას კომპაქტური ფორმა აქვს, რადგან ნოზეილინი 15 მლ-იანი ფლაკონის სახითაა წარმოდგენილი. მისი თავი საშუალებას იძლევა, რომ პრეპარატი ჰიგიენური წესების დაცვით ჩაიწვეთოთ როგორც ცხვირში, ისე თვალში, რაც კომფორტულია ნებისმიერი ასაკის პაციენტისთვის.

რისგან შედგება და როგორ მოქმედებს ნოზეილინი

ნოზეილინი ორ აქტიურ ნივთიერებას შეიცავს, რომლებიც ზემოქმედებს როგორც ალერგიის, ისე ანთებითი პროცესის წინააღმდეგ:

  • ნაფაზოლინის ჰიდროქლორიდი (0.5 მგ 1 მლ-ში) — ალფა-ადრენომიმეტური საშუალება, რომელიც სისხლძარღვების სწრაფად და ხანგრძლივ შევიწროებას იწვევს. მისი მოქმედება მცირე დროში ხსნის ცხვირის ლორწოვანი გარსის შეშუპებას, ამცირებს ჰიპერემიას და ხელს უწყობს ცხვირიდან გამონადენის შემცირებას. იგი ეფექტიანად ხსნის ცხვირის გაჭედვას და აღადგენს თავისუფალ სუნთქვას.
  • ქლორფენირამინის მალეატი (0.5 მგ 1 მლ-ში) — ჰისტამინის H1 რეცეპტორების ბლოკატორი, რომელიც ზღუდავს ალერგიულ რეაქციას და ამცირებს ანთებით პროცესს. ის აუმჯობესებს ცხვირის, ცხვირ-ხახისა და თვალის ლორწოვანის მდგომარეობას, ამცირებს ისეთ სიმპტომებს, როგორიცაა ქავილი, სურდო, ცემინება, ცრემლდენა და ლორწოვანის შეშუპება.

დამხმარე ნივთიერებებია: ნატრიუმის ციტრატი, დინატრიუმის ედეტატი, ბენზალკონიუმის ქლორიდი, ბორის მჟავა და დისტილირებული წყალი. ისინი პრეპარატის სტაბილურობასა და ანტისეპტიკურ ეფექტს განაპირობებს, ასევე თვალისა და ცხვირის ლორწოვანთან სითხის ფიზიოლოგიურ შესაბამისობას უწყობს ხელს.

ნოზეილინი თვალის პრობლემების სამკურნალოდ გამოყენებისას ქლორფენირამინის მეშვეობით ხელს უწყობს ჰიპერემიის, ქავილისა და ცრემლდენის შემცირებას; ბორის მჟავა და დისტილირებული წყალი ბუნებრივ წონასწორობასა და თვალის გარემოს შენარჩუნებას უზრუნველყოფს.

ნოზეილინი ცხვირის პრობლემებისთვის მოხმარებისას ამცირებს სეკრეციას, ხსნის შეშუპებას და ხელს უწყობს ღრმად მდებარე სინუსების დრენაჟს, რაც განსაკუთრებით მნიშვნელოვანია სინუსიტის დროს.

რა შემთხვევებში ინიშნება ნოზეილინი

ნოზეილინის გამოყენება რეკომენდებულია შემდეგი კლინიკური მდგომარეობებისას:

  • ალერგიული რინიტი (მათ შორის სეზონური და მუდმივი);
  • სურდო და ცხვირის გაჭედვა;
  • სინუსიტი და დანამატი წიაღების ანთება;
  • თვალის ალერგიული დაავადებები (ქავილი, ცრემლდენა, ჰიპერემია);

პრეპარატი განსაკუთრებით გამოსადეგია გაციებასთან ერთად მიმდინარე ალერგიული რეაქციების დროს, როცა ერთდროულად იჩენს თავს როგორც ცხვირის, ისე თვალის მხრივ გამოხატული სიმპტომები.

 

ნოზეილინი ანოტაცია

პრეპარატის მიღების წესი და რეკომენდებული დოზირება

ნოზეილინის წვეთები გამოიყენება ადგილობრივად როგორც თვალში, ისე ცხვირში ჩასაწვეთებლად. მისი დოზირება დამოკიდებულია სამკურნალო მიზანსა და სიმპტომების ინტენსივობაზე.

ნოზეილინი ცხვირის წვეთების სახით შემდეგნაირად მიიღება: თითოეულ ნესტოში 2 წვეთის ოდენობით, დღეში 4-ჯერ. ეს უზრუნველყოფს ლორწოვანი გარსის შეშუპების შემცირებას, ცხვირის ღრუს გაწმენდასა და ნორმალური სუნთქვის აღდგენას. სასურველია, ცხვირში პრეპარატი დღის განმავლობაში თანაბარი ინტერვალებით ჩაიწვეთოთ, რათა პრეპარატის მოქმედება უფრო ეფექტიანი იყოს.

ოფთალმოლოგიური გამოყენებისას ნოზეილინის 1-2 წვეთი ყოველ 3 ან 6 საათში ერთხელ ინიშნება (თითო თვალში), რაც სიმპტომების სიმძიმის მიხედვით განისაზღვრება. თუკი სიმპტომები ძლიერია (მაგ., ქავილი, სიწითლე, ცრემლდენა), დაშვებულია მაქსიმალური სიხშირით — ყოველ 3 საათში მიღება, თუმცა მდგომარეობის გაუმჯობესების პარალელურად რეკომენდებულია სიხშირის შემცირება დღეში 3-ჯერ ან 4-ჯერ ჩაწვეთებამდე.

ნოზეილინი ბავშვებში 2-6 წლამდე ასაკში თვალშიც და ცხვირშიც დღეში 3-ჯერ თითო წვეთის ოდენობით ინიშნება.

დოზის გადაჭარბება რეკომენდებული არაა, რათა თავიდან აიცილოთ ლორწოვანი გარსის გამაღიზიანებელი ეფექტები ან სისტემური აბსორბციის რისკები; ჩაწვეთებისას საჭიროა ფლაკონის წვერის სისუფთავის შენარჩუნება და თვალის ან ცხვირის ზედაპირთან შეხებისგან თავის არიდება.

როგორია ნოზეილინის უკუჩვენებები

ნოზეილინის თვალის/ცხვირის წვეთები არ უნდა გამოიყენოთ იმ შემთხვევაში, თუ ერთ-ერთი ან რამდენიმე ქვემოთ ჩამოთვლილი მდგომარეობა აღგენიშნებათ:

  • მომატებული მგრძნობელობა პრეპარატის რომელიმე კომპონენტის მიმართ — შესაძლოა, გამოვლინდეს როგორც ალერგიული რეაქცია, ქავილი, სიწითლე, წვა ან შეშუპება ჩაწვეთების შემდეგ;
  • დახურულკუთხიანი გლაუკომა — თვალშიდა წნევის პათოლოგია, რომლის დროსაც ნაზეილინის ზოგიერთმა კომპონენტმა (განსაკუთრებით კი ნაფაზოლინმა), შესაძლოა, თვალის შიგნით წნევა გაზარდოს და მდგომარეობა გაამწვავოს;
  • 2 წლამდე ასაკის ბავშვები — ამ ასაკობრივ ჯგუფში პრეპარატის უსაფრთხოება სრულად დადგენილი არ არის, ამიტომ მისი გამოყენება რეკომენდებული არაა.

უკუჩვენებების იგნორირებამ შეიძლება არასასურველი ეფექტები გამოიწვიოს, რის გამოც მკურნალობის დაწყებამდე ექიმთან ან ფარმაცევტთან კონსულტაციაა სასურველი.

 

ნოზეილინი ანოტაცია

პრეპარატის გამოშვების ფორმა და შენახვის პირობები

პრეპარატი წარმოდგენილია 5 მლ-იანი პლასტმასის ფლაკონით, რომელიც აღჭურვილია სპეციალური საწვეთურით. მცირე მოცულობის გამო, ფლაკონი პრაქტიკულია სატარებლად. ნოზეილინი სპრეის სახით ხელმისაწვდომი არაა.

ნოზეილინის ეფექტიანობისა და სტერილურობის შესანარჩუნებლად აუცილებელია დაცული იყოს შესაბამისი შენახვის პირობები:

  • შეინახეთ სინათლისგან დაცულ ადგილას, რათა თავიდან აიცილოთ მზის პირდაპირი ზემოქმედებით კომპონენტების დეგრადაცია;
  • ტემპერატურა უნდა მერყეობდეს 15-დან 25°C-მდე, რაც ოთახის ტემპერატურაა. მაღალმა ან ძალიან დაბალმა ტემპერატურამ პრეპარატის თვისებებზე შეიძლება უარყოფითად იმოქმედოს;
  • შეინახეთ ბავშვებისთვის მიუწვდომელ ადგილზე, რათა თავიდან აიცილოთ შემთხვევითი გამოყენება.

ფლაკონის გახსნის შემდეგ პრეპარატი 30 დღის განმავლობაშია ვარგისი. ამ ვადის გასვლის შემდეგ მისი სტერილურობა და ქიმიური სტაბილურობა აღარ არის გარანტირებული, ამიტომ წვეთების გამოყენება აღარ არის მიზანშეწონილი.

ნოზეილის ფასი პსპ-ს სააფთიაქო ქსელში 23 ლარამდეა, თუმცა აქციის ფარგლებში მისი ღირებულება პერიოდულად მცირდება.

6 აგვ 2025