აირჩიეთ ქალაქი აირჩიეთ ქალაქი

როგორ გამოვიყენოთ ნიფედიპინი — წნევის წამალი გულის გამართული მუშაობისთვის

უკან

როგორ გამოვიყენოთ ნიფედიპინი — წნევის წამალი გულის გამართული მუშაობისთვის

10 ივნ 2025

ნიფედიპნის გამოყენების წესი

 

 

ნიფედიპინი გერმანული წარმოების პრეპარატია, რომელიც გულის პრობლემებისა და მაღალი არტერიული წნევის სამკურნალოდ გამოიყენება. მას ნიფედი-დენკის სახელით ვიცნობთ. 

აფთიაქებში ეს მედიკამენტი მოქმედი ნივთიერების სხვადასხვა შემცველობით არის ხელმისაწვდომი. იგი ქართული წარმოებითაც გვხვდება და ნიფედიპინი ნეო ეწოდება. ნიფედიპინი 20მგ, ასევე ნიფედიპინი 10 მგ პსპ-ს ონლაინ აფთიაქში შეგიძლიათ შეიძინოთ.

პრეპარატი მაქსიმალურად ეფექტიანი მაშინ იქნება, თუ მას ექიმის დანიშნულებით, შესაბამისი წესების დაცვით გამოვიყენებთ. იმისათვის, რომ წამლის მიღებამდე მაქსიმალურად ინფორმირებულები ვიყოთ, მოდით, მისი მიღების წესები და უსაფრთხოების ზომები დეტალურად მიმოვიხილოთ.  

რისი წამალია ნიფედიპინი და როდის (არ) გამოიყენება?

ნიფედიპინი დენკი (იგივე ნიფედი-დენკი) მაღალი წნევისა (იგივე ჰიპერტენზია) და გულთან დაკავშირებული პრობლემების სამკურნალოდ გამოიყენება. წამლის მოქმედი ნივთიერება, იმავე სახელით ნიფედიპინი, კალციუმის არხების ანტაგონისტია. ეს პრეპარატი სისხლძარღვებს აფართოებს, ეს კი წნევას ამცირებს და გულისათვის სისხლის მიწოდებას აუმჯობესებს. პრეპარატი შემდეგ შემთხვევებში გამოიყენება:

 

  • გულის არეში ქრონიკული, სტაბილური ტკივილის დროს (დაძაბულობის ანგინა);
  • ვაზოსპასტიური სტენოკარდიის დროს (პრონცმეტალის ანგინა, გარდამავალი ანგინა);
  • ესენციური ჰიპერტენზიის სამკურნალოდ;
  • პრეეკლამფსიისა და ნაადრევი მშობიარობის პრევენციისთვის ნიფედიპინი ორსულებში სიფრთხილით ინიშნება (სარგებელმა ამ დროს შესაძლო რისკები უნდა გადაწონოს).  

ნიფედიპინის გამოყენება არ შეიძლება შემდეგ შემთხვევებში:

 

  • ამ პრეპარატისადმი მომატებული მგრძნობელობისას;
  • არასტაბილური სტენოკარდიისას;
  • კარდიოცირკულატორული შოკის დროს;
  • სისხლძარღვთა ძლიერი შევიწროების დროს, რომელიც გულის აორტისკენ არის მიმართული (ეს იგივეა, რაც მაღალი ხარისხის აორტის სტენოზი);
  • კომბინირებული მკურნალობის დროს რიფამპიცინთან ერთად; ეს ტუბერკულოზის სამკურნალო ნივთიერებაა და ნიფედიპინთან ურთიერთქმედებს;
  • მწვავე მიოკარდიული ინფარქტის დროს (როცა 4 კვირა ჯერ არ არის გასული). 

ნიფედიპინის მიღებისას განსაკუთრებული სიფრთხილეა საჭირო შემდეგ შემთხვევებში: 

 

  • დაბალი არტერიული წნევის დროს (ძლიერი ჰიპოტენზია, როცა სისტოლური წნევა 90 მმ. ვწ. სვ. ან ნაკლებია);
  • დეკომპენსირებული გულის უკმარისობის დროს; 
  • თუკი პრეპარატს მაღალი არტერიული წნევის მქონე დიალიზიანი პაციენტი იღებს; ამ დროს მოცირკულირე სისხლი შემცირებულია (ამას ჰიპოვოლემია ჰქვია), ამიტომ სისხლძარღვების გაფართოების შედეგად არტერიული წნევა შეიძლება მკვეთრად დაეცეს. 

გაითვალისწინეთ, რომ ღვიძლის დისფუნქციის დროს შეიძლება ნიფედიპინის გამოყოფა შეყოვნდეს. ამ დროს ექიმმა მკურნალობის პროცესი ყურადღებით უნდა გააკონტროლოს და საჭიროების შემთხვევაში დოზა შეამციროს. თუ აღმოჩნდა, რომ ტვინში სისხლის მიმოქცევა დაირღვა, მკურნალობა შემცირებული დოზებით უნდა გაგრძელდეს. 

 

ნიფედიპინი გულის პრობლემების დროს

ნიფედიპინი და ორსულობა — რა უნდა ვიცოდეთ 

ორსულობის დროს ნიფედიპინის გამოყენება რეკომენდებული არ არის, გარდა იმ შემთხვევებისა, როცა მკურნალობის სარგებელი შესაძლო რისკებს აღემატება. ცხოველებზე ჩატარებული კვლევებით ნაყოფის დისტრესის შემთხვევები (მაგალითად, დეფორმაციები) გამოვლინდა. მეორე მხრივ, ადამიანებში საკმარისი კლინიკური მონაცემები არ არსებობს და დაზუსტებით ვერ ვიტყვით, გამოიწვევს თუ არა ეს მედიკამენტი ნაყოფის დაზიანებას. 

იმ შემთხვევაში, თუ ორსულობა ნიფედი-დენკით მკურნალობისას დგება, მნიშვნელოვანია, რომ ეს ექიმს დაუყოვნებლივ აცნობოთ. იგი სხვა მედიკამენტს შეგირჩევთ ან მკურნალობის პროცესს უფრო ყურადღებით გააკონტროლებს. 

ცნობილია, რომ ნიფედიპინი დედის რძეში გადადის. დადასტურებული არ არის, რამდენად აყენებს ეს ჩვილს ზიანს. შესაბამისად, უმჯობესია, ამ წამლის მიღებისას ძუძუთი კვება დროებით შეწყვიტოთ. 

 

ნიფედიპინი და მაღალი არტერიული წნევა

როგორია პრეპარატის მიღების წესი 

 

ეს მედიკამენტი აფთიაქიდან რეცეპტით გაიცემა და ექიმმა უნდა დანიშნოს. ნიფედიპინი 10მგ (ნიფედი-დენკის ის ფორმა, რომელიც თითო ტაბლეტში 10 მილიგრამ მოქმედ ნივთიერებას შეიცავს) შემდეგი წესით გამოიყენება:

 

  • ქრონიკული სტაბილური სტენოკარდიისას — 10მგ ტაბლეტი დღეში 2-ჯერ (ანუ ნიფედიპინი 20 მგ რაოდენობით დღეში);
  • ვაზოსპასტიური სტენოკარდიის (პრონცმეტალის ანგინა, ცვალებადი ანგინა) ან ესენციური ჰიპერტენზიის დროს — 10 მგ ტაბლეტი დღეში 2-ჯერ. საჭიროების შემთხვევაში დოზის გაზრდა 20-40 მილიგრამამდეც შეიძლება (შესაბამისად, 10-მილიგრამიანი 2 ან 4 ტაბლეტი დღეში).

 

ნიფედიპინი დაუღეჭავად უნდა გადაყლაპოთ და საკმარისი რაოდენობის წყალი მიაყოლოთ. ეს წამალი ჭამის შემდეგ მიიღება. სასურველია, ეს ერთსა და იმავე დროს,  დილას და საღამოს, გააკეთოთ. 

არ მიიღოთ ეს პრეპარატი გრეიპფრუტის წვენთან ერთად, რადგან იგი ნიფედიპინის დაშლას აფერხებს და მის მოქმედებას აძლიერებს.

 

ნუფედიპინი გულის ჯანმრთელობისთვის

რა გვერდით მოვლენებს უნდა ველოდოთ ამ მედიკამენტის მიღებისას? 

ამ მედიკამენტის მიღებისას გვერდითმა მოვლენებმაც შეიძლება იჩინოს თავი, თუმცა ეს სიმპტომები სახიფათო ნაკლებადაა. შედარებით ხშირად ვითარდება: თავის ტკივილი, თავბრუსხვევა, სახის სიწითლე, გულის ფრიალი და წნევის დაქვეითება. ასევე შეიძლება გამოვლინდეს მუცლის ტკივილი, გულისრევა ან ფეხების მსუბუქი შეშუპებაც.

სერიოზული გვერდითი მოვლენები იშვიათია. ეს შეიძლება იყოს: ძლიერი ჰიპოტენზია, გულმკერდის ტკივილი, ღვიძლის ფუნქციის დარღვევა ან ალერგიული რეაქციები. ასეთ შემთხვევებში უმჯობესია, ექიმს დაუყოვნებლივ მიმართოთ.

გაითვალისწინეთ ისიც, რომ ნიფედი-დენკი სხვა წამლებთან ურთიერთქმედებს. მათ შორისაა: არტერიული წნევის დამაქვეითებელი მედიკამენტები და ტრიციკლური ანტიდეპრესანტები, არითმიის საწინააღმდეგო საშუალებები, ნიტრატები, ცეფალოსპორინები, დილტიაზემი, ბეტა-რეცეპტორების ბლოკატორები, ციმეტიდინი, რიფამპიცინი, დიგოქსინი, თეოფილინი, და ვინკრისტინი. 

საფრთხის თავიდან ასარიდებლად აუცილებლად აცნობეთ ექიმს ან ფარმაცევტს ყველა იმ მედიკამენტის შესახებ, რომლებსაც იღებთ ან უახლოესი პერიოდის განმავლობაში მიგიღიათ.

პრეპარატი მაქსიმუმ 25°C ტემპერატურაზე უნდა შეინახოთ, ბავშვებისთვის მიუწვდომელ ადგილას. მოარიდეთ სინათლესა და ნესტს. გაითვალისწინეთ, რომ პრეპარატი გამოშვებიდან 3 წლის განმავლობაშია ვარგისი. ამ ვადის გასვლის შემდეგ მედიკამენტი არ უნდა გამოიყენოთ. 

ნიფედიპინი პსპ-ს სააფთიაქო ქსელში შეგიძლიათ მოიძიოთ. 



10 ივნ 2025